hrissur-road-neglect
തൃശൂരിലെ ഈസ്റ്റ് ടിപ്പു സുൽത്താൻ റോഡിൽ കുടിവെള്ള പൈപ്പ് സ്ഥാപിക്കാനായി പൊളിച്ചിട്ട റോഡ് ആറുമാസം പിന്നിട്ടിട്ടും പുനർനിർമ്മിക്കാത്തത് നാട്ടുകാർക്ക് വലിയ ദുരിതമായി മാറുന്നു. ദേശീയപാതയ്ക്ക് സമാന്തരമായി ചേറ്റുവ മുതൽ മതിലകം വരെയുള്ള പാതയിൽ, നാട്ടിക മുതൽ ചേറ്റുവ വരെയുള്ള ഏകദേശം 15 കിലോമീറ്റർ ദൂരത്താണ് പൈപ്പ് ലൈൻ സ്ഥാപിക്കാനായി ഒരു മീറ്ററോളം വീതിയിൽ റോഡ് വെട്ടിപ്പൊളിച്ചത്. പൈപ്പ് സ്ഥാപിക്കുന്ന ജോലികൾ പൂർത്തിയായെങ്കിലും, റോഡ് പഴയ സ്ഥിതിയിലാക്കാനുള്ള നടപടികൾ അധികൃതരുടെ ഭാഗത്തുനിന്ന് ഉണ്ടായിട്ടില്ല. നിലവിൽ വെട്ടിപ്പൊളിച്ച ഭാഗത്ത് വലിയ കട്ടക്കല്ലുകൾ വിരിക്കുക മാത്രമാണ് ചെയ്തത്; ടാറിങ് ഉൾപ്പെടെയുള്ള അറ്റകുറ്റപ്പണികൾ എങ്ങുമെത്തിയിട്ടില്ല. കരാർ നടപടികൾ പൂർത്തിയായിട്ടുണ്ടെങ്കിലും റോഡ് സഞ്ചാരയോഗ്യമാക്കൽ അനന്തമായി നീളുന്നതിൽ വലിയ പ്രതിഷേധമാണ് ഉയരുന്നത്. വലിയ കുഴികളും കല്ലുകളും നിറഞ്ഞ റോഡിലൂടെയുള്ള യാത്ര അത്യന്തം അപകടകരമായി മാറിയിരിക്കുകയാണ്. ഗതാഗതം ദുഷ്കരമായ സാഹചര്യത്തിൽ അധികൃതർ അടിയന്തരമായി ഇടപെട്ട് റോഡ് അറ്റകുറ്റപ്പണികൾ പൂർത്തിയാക്കി സഞ്ചാരയോഗ്യമാക്കണമെന്നാണ് നാട്ടുകാരുടെ ശക്തമായ ആവശ്യം.
About The Author
