SSLC Results 2026: ഇന്ന് ഉച്ചയ്ക്ക് 3 മണിക്ക് ഫലം...

എസ്.എസ്.എൽ.സി ഫലം ഇന്ന്; ഉച്ചയ്ക്ക് 3 മണിക്ക് പരീക്ഷാ ഫലം അറിയാം.

സംസ്ഥാനത്തെ ലക്ഷക്കണക്കിന് വിദ്യാർത്ഥികളുടെയും രക്ഷിതാക്കളുടെയും നെഞ്ചിടിപ്പേറ്റി ഈ വർഷത്തെ എസ്.എസ്.എൽ.സി പരീക്ഷാ ഫലം ഇന്ന് പ്രഖ്യാപിക്കുന്നു. (SSLC Results 2026) ഇന്ന് ഉച്ചയ്ക്ക് കൃത്യം മൂന്ന് മണിക്ക് തിരുവനന്തപുരത്ത് നടക്കുന്ന വാർത്താസമ്മേളനത്തിൽ വിദ്യാഭ്യാസ മന്ത്രിയാണ് ഔദ്യോഗികമായി ഫലപ്രഖ്യാപനം നടത്തുക. മാർച്ച് മാസം നടന്ന പരീക്ഷയിൽ സംസ്ഥാനത്തിനകത്തും ഗൾഫ് മേഖലയിലുമായി നാല് ലക്ഷത്തിലധികം വിദ്യാർത്ഥികളാണ് ഇത്തവണ പരീക്ഷ എഴുതിയത്. പരീക്ഷാ ഫലത്തോടൊപ്പം തന്നെ ടി.എച്ച്.എസ്.എൽ.സി, എ.എച്ച്.എസ്.എൽ.സി ഫലങ്ങളും പ്രഖ്യാപിക്കും. വൈകുന്നേരം നാല് മണി മുതൽ പരീക്ഷാ ഭവന്റെ ഔദ്യോഗിക വെബ്‌സൈറ്റുകളായ results.kite.kerala.gov.in, pareekshabhavan.kerala.gov.in എന്നിവയിലൂടെയും ‘സഫലം’ മൊബൈൽ ആപ്പ് വഴിയും വിദ്യാർത്ഥികൾക്ക് ഫലം പരിശോധിക്കാവുന്നതാണ്. മൂല്യനിർണ്ണയ ക്യാമ്പുകൾ പൂർത്തിയാക്കി റെക്കോർഡ് വേഗത്തിലാണ് ഇത്തവണയും വിദ്യാഭ്യാസ വകുപ്പ് ഫലപ്രഖ്യാപനത്തിലേക്ക് കടക്കുന്നത്. ഉന്നത പഠനത്തിനായുള്ള ഗ്രേഡിംഗ് രീതിയും വിജയശതമാനവും സംബന്ധിച്ച പൂർണ്ണരൂപം മൂന്ന് മണിയോടെ പുറത്തുവരും. പരീക്ഷ എഴുതിയ എല്ലാ വിദ്യാർത്ഥികൾക്കും മികച്ച വിജയം ആശംസിക്കുന്നു.