Pallichattambi Release Buzz
മലയാള സിനിമാ പ്രേമികൾ ഏറെ ആകാംക്ഷയോടെ കാത്തിരിക്കുന്ന ടൊവിനോ തോമസ് ചിത്രമാണ് ഡിജോ ജോസ് ആന്റണി സംവിധാനം ചെയ്യുന്ന ‘പള്ളിച്ചട്ടമ്പി’. ഏപ്രിൽ 10-ന് റിലീസ് നിശ്ചയിച്ചിരുന്ന ചിത്രം, കേരളത്തിലെ തിരഞ്ഞെടുപ്പ് പെരുമാറ്റച്ചട്ടം നിലനിൽക്കുന്ന സാഹചര്യത്തിൽ സെൻസർ സർട്ടിഫിക്കറ്റ് ലഭിക്കുന്നതിലുണ്ടായ സാങ്കേതിക തടസ്സങ്ങളെത്തുടർന്ന് റിലീസ് ഏപ്രിൽ 15-ലേക്ക് മാറ്റുകയായിരുന്നു. ഈ വർഷത്തെ വമ്പൻ വിഷു റിലീസായി എത്തുന്ന ചിത്രത്തെ വലിയ പ്രതീക്ഷയോടെയാണ് സിനിമാലോകം ഉറ്റുനോക്കുന്നത്. അഞ്ച് ഭാഷകളിലായി ലോകമെമ്പാടുമുള്ള തിയേറ്ററുകളിൽ ചിത്രം റിലീസ് ചെയ്യും.
1950-60 കാലഘട്ടത്തിലെ മലയോര മേഖലയിലെ കുടിയേറ്റ കർഷകരുടെ ജീവിതം പശ്ചാത്തലമാക്കി ഒരുക്കുന്ന ഒരു പീരീഡ് ഡ്രാമ ത്രില്ലറാണ് ‘പള്ളിച്ചട്ടമ്പി’. ഈ കാലഘട്ടത്തിലെ ‘ചട്ടമ്പി’ എന്ന വാക്കിന്റെ അർത്ഥവും പ്രാധാന്യവും വ്യക്തമാക്കുന്ന, ഒരു പ്രദേശത്തിന്റെ നായകനായുള്ള ടൊവിനോയുടെ വേഷപ്പകർച്ചയാണ് ചിത്രത്തിന്റെ പ്രധാന ആകർഷണം. ‘എ ആർ എം’ എന്ന ചിത്രത്തിലെ മണിയൻ എന്ന കഥാപാത്രത്തെപ്പോലും കടത്തിവെട്ടുന്ന പ്രകടനമായിരിക്കും ടൊവിനോ ഈ ചിത്രത്തിലൂടെ കാഴ്ചവെക്കുകയെന്നാണ് പുറത്തുവരുന്ന റിപ്പോർട്ടുകൾ. ചിത്രത്തിന്റെ ട്രെയിലറും ടൊവിനോയുടെ മാസ് ആക്ഷൻ രംഗങ്ങളും ഇതിനോടകം തന്നെ സോഷ്യൽ മീഡിയയിൽ വലിയ തരംഗമായി മാറിക്കഴിഞ്ഞു.
എസ്. സുരേഷ് ബാബുവാണ് ഈ ബിഗ് ബജറ്റ് ചിത്രത്തിന്റെ തിരക്കഥ രചിച്ചിരിക്കുന്നത്. കയാദു ലോഹർ നായികയായി എത്തുന്ന ചിത്രത്തിൽ വിജയരാഘവൻ, ബാബുരാജ്, ജോണി ആന്റണി, സുധീർ കരമന തുടങ്ങിയവർ പ്രധാന വേഷങ്ങളിൽ എത്തുന്നു. ടിജോ ടോമി ക്യാമറയും ജേക്സ് ബിജോയ് സംഗീതവും നിർവഹിക്കുന്നു. സൗദി അറേബ്യയിൽ വെച്ച് നടന്ന പ്രൗഢഗംഭീരമായ ട്രെയിലർ റിലീസും സിനിമയ്ക്ക് വലിയ ഹൈപ്പ് നൽകിയിട്ടുണ്ട്. ആരാധകരുടെ കാത്തിരിപ്പിന് വിരാമമിട്ടുകൊണ്ട് വിഷു ദിനത്തിൽ ‘പള്ളിച്ചട്ടമ്പി’ തിയേറ്ററുകൾ കീഴടക്കാൻ ഒരുങ്ങുകയാണ്.
About The Author
