Kumbh Viral Wedding Shock
കുംഭമേളയിൽ വൈറലായ പെൺകുട്ടിയുടെ വിവാഹവുമായി ബന്ധപ്പെട്ട് പൊലീസിന്റെ ഭാഗത്തുനിന്ന് യാതൊരു വീഴ്ചയും സംഭവിച്ചിട്ടില്ലെന്ന് തിരുവനന്തപുരം പൊലീസിന്റെ റിപ്പോർട്ട്. വിവാഹ സമയത്ത് പെൺകുട്ടി ഹാജരാക്കിയ ആധാർ കാർഡ് യഥാർത്ഥമാണെന്നും, അത് യുഐഡിഎഐ (UIDAI) വെബ്സൈറ്റിൽ പരിശോധിച്ചതിൽ നിന്ന് വ്യക്തമാണെന്നുമാണ് റിപ്പോർട്ടിൽ പറയുന്നത്. ആധാർ കാർഡിലെ വിവരങ്ങൾ ജനന സർട്ടിഫിക്കറ്റിലുള്ളതുമായി ഒത്തുപോകുന്നുണ്ടെന്നും പൊലീസ് വ്യക്തമാക്കിയിട്ടുണ്ട്. എന്നാൽ, ജനന സർട്ടിഫിക്കറ്റിന്റെ ആധികാരികത സ്ഥിരീകരിക്കാൻ നിലവിൽ പൊലീസിന് സംവിധാനങ്ങളില്ലെന്നും റിപ്പോർട്ടിൽ വിശദീകരിക്കുന്നു. ഈ റിപ്പോർട്ട് സംസ്ഥാന ഡിജിപിക്ക് കൈമാറിയിട്ടുണ്ട്. ഇതിനിടയിൽ, വിവാഹത്തിൽ പ്രായപൂർത്തിയാകാത്ത പെൺകുട്ടിയെ ഉൾപ്പെടുത്തിയെന്നും വ്യാജ രേഖകൾ ചമച്ചുവെന്നും ആരോപിച്ച് ദേശീയ പട്ടികവർഗ്ഗ കമ്മീഷൻ കേസെടുത്തിട്ടുണ്ട്. ഇതിന്റെ അടിസ്ഥാനത്തിൽ പെൺകുട്ടിയുടെ ഭർത്താവ് ഫർമാൻ ഖാനെതിരെ പോക്സോ നിയമപ്രകാരം മധ്യപ്രദേശ് പൊലീസ് കേസെടുത്തിട്ടുണ്ട്. ഈ സംഭവത്തിൽ കേരളത്തിലെയും മധ്യപ്രദേശിലെയും ഡിജിപിമാർ ഈ മാസം 22-ന് ദേശീയ പട്ടികവർഗ്ഗ കമ്മീഷന് മുമ്പാകെ നേരിട്ട് ഹാജരാകണമെന്നാണ് നിർദേശം. വിവാഹവുമായി ബന്ധപ്പെട്ട് വ്യാജ ജനന സർട്ടിഫിക്കറ്റ് നിർമ്മിച്ചതായും കമ്മീഷൻ കണ്ടെത്തിയിട്ടുണ്ട്. മധ്യപ്രദേശിലെ ആശുപത്രി രേഖകൾ പ്രകാരം 2009 ഡിസംബർ 30-നാണ് പെൺകുട്ടി ജനിച്ചത്, അതായത് വിവാഹ സമയത്ത് പെൺകുട്ടിക്ക് 16 വയസ്സ് മാത്രമായിരുന്നു പ്രായമെന്നും കമ്മീഷൻ ചൂണ്ടിക്കാട്ടുന്നു.
About The Author
