Womens Reservation Push
ലോക്സഭയിലും നിയമസഭകളിലും സ്ത്രീകൾക്ക് 33 ശതമാനം സംവരണം ഉറപ്പാക്കുന്ന വനിതാ സംവരണ നിയമം വേഗത്തിൽ നടപ്പിലാക്കുന്നതിനായി പിന്തുണ അഭ്യർഥിച്ച് പ്രധാനമന്ത്രി നരേന്ദ്ര മോദി വിവിധ രാഷ്ട്രീയ കക്ഷി നേതാക്കൾക്ക് കത്തയച്ചു. 2029-ലെ പൊതുതിരഞ്ഞെടുപ്പിന് മുന്നോടിയായി സംവരണം നടപ്പിലാക്കുന്നതിനും, ഇതിനായി മണ്ഡല പുനർനിർണയ (ഡീലിമിറ്റേഷൻ) കമ്മീഷൻ രൂപീകരിക്കുന്നതിനുമുള്ള രണ്ട് ബില്ലുകൾക്ക് കേന്ദ്ര മന്ത്രിസഭ ഇതിനകം അംഗീകാരം നൽകിയിട്ടുണ്ട്. സമൂഹത്തിന്റെ പുരോഗതിക്കും ഇന്ത്യയുടെ ദീർഘകാല വളർച്ചയ്ക്കും സ്ത്രീകളുടെ രാഷ്ട്രീയ പങ്കാളിത്തം അത്യന്താപേക്ഷിതമാണെന്ന് പ്രധാനമന്ത്രി കത്തിൽ ഊന്നിപ്പറയുന്നു.
നിലവിൽ 2023-ൽ പാസാക്കിയ നിയമപ്രകാരം അടുത്ത സെൻസസിന് ശേഷമേ മണ്ഡല പുനർവിഭജനം സാധ്യമാകൂ. എന്നാൽ, ഇത് മാറ്റിയെഴുതി 2011-ലെ സെൻസസ് അടിസ്ഥാനത്തിൽ മണ്ഡലങ്ങൾ പുനർനിർണയിച്ച് 33 ശതമാനം സംവരണം നടപ്പിലാക്കാനാണ് പുതിയ ഭരണഘടനാ ഭേദഗതിയിലൂടെ സർക്കാർ ലക്ഷ്യമിടുന്നത്. ഈ മാറ്റം വരുന്നതോടെ ലോക്സഭാ സീറ്റുകളുടെ എണ്ണം 540-ൽ നിന്ന് 816 ആയി ഉയരും, അതിൽ 273 സീറ്റുകൾ സ്ത്രീകൾക്കായി സംവരണം ചെയ്യപ്പെടും. ഈ ബിൽ പാസാക്കാൻ പാർലമെന്റിൽ മൂന്നിൽ രണ്ട് ഭൂരിപക്ഷം അനിവാര്യമാണ്.
അതേസമയം, സർക്കാരിന്റെ ഏകപക്ഷീയമായ തീരുമാനങ്ങളെ ചോദ്യം ചെയ്ത് കോൺഗ്രസ് അധ്യക്ഷൻ മല്ലികാർജുൻ ഖാർഗെ രംഗത്തെത്തി. പ്രതിപക്ഷവുമായി കൂടിയാലോചനകൾ നടത്താതെ പ്രത്യേക പാർലമെന്റ് സമ്മേളനം വിളിച്ച നടപടിയിൽ അദ്ദേഹം അതൃപ്തി രേഖപ്പെടുത്തി. മണ്ഡല പുനർനിർണയം സംബന്ധിച്ച വ്യക്തമായ വിവരങ്ങൾ പുറത്തുവിടണമെന്നും, സംസ്ഥാന തിരഞ്ഞെടുപ്പുകൾക്ക് ശേഷം അടിയന്തരമായി സർവകക്ഷി യോഗം വിളിക്കണമെന്നും ഖാർഗെ പ്രധാനമന്ത്രിക്കുള്ള മറുപടി കത്തിൽ ആവശ്യപ്പെട്ടു.
About The Author
