Tamil Nadu TASMAC: വിജയ് സർക്കാരിന്റെ വമ്പൻ...

തമിഴ്‌നാട്ടിൽ മദ്യശാലകൾക്ക് പൂട്ടിട്ട് വിജയ് സർക്കാർ; 717 ടാസ്മാക് ഷോപ്പുകൾ ഉടൻ അടച്ചുപൂട്ടും!

തമിഴ്‌നാട് മുഖ്യമന്ത്രി സി. ജോസഫ് വിജയ്‌യുടെ നിർദ്ദേശപ്രകാരം സംസ്ഥാനത്തെ മദ്യശാലകൾക്ക് കർശന നിയന്ത്രണം വരുന്നു. ആരാധനാലയങ്ങൾ, വിദ്യാഭ്യാസ സ്ഥാപനങ്ങൾ, ബസ് സ്റ്റാൻഡുകൾ എന്നിവയുടെ 500 മീറ്റർ ചുറ്റളവിൽ പ്രവർത്തിക്കുന്ന 717 ടാസ്മാക് (TASMAC) മദ്യവില്പനശാലകൾ രണ്ടാഴ്ചയ്ക്കുള്ളിൽ അടച്ചുപൂട്ടാനാണ് സർക്കാർ ഉത്തരവിട്ടിരിക്കുന്നത്. നിലവിൽ സംസ്ഥാനത്തുടനീളം 4765 ഔട്ട്‌ലെറ്റുകൾ പ്രവർത്തിക്കുന്നുണ്ടെങ്കിലും, പൊതുജനങ്ങളുടെ സുരക്ഷയും സമാധാനവും മുൻനിർത്തിയാണ് മുഖ്യമന്ത്രിയുടെ ഈ നിർണ്ണായക നീക്കം. ഇതിന്റെ ഭാഗമായി നടന്ന പരിശോധനയിൽ 276 ആരാധനാലയങ്ങൾക്ക് സമീപവും, 186 വിദ്യാഭ്യാസ സ്ഥാപനങ്ങൾക്ക് സമീപവും, 255 ബസ് സ്റ്റാൻഡുകൾക്ക് സമീപവും മദ്യശാലകൾ പ്രവർത്തിക്കുന്നതായി കണ്ടെത്തി. പൊതുയിടങ്ങളിലെ മദ്യവില്പനയെക്കുറിച്ചുള്ള ജനങ്ങളുടെ പരാതികൾ പരിഹരിക്കുക എന്ന ലക്ഷ്യത്തോടെയാണ് ഈ നടപടിയെന്ന് സർക്കാർ വൃത്തങ്ങൾ വ്യക്തമാക്കി.