KSRTC bus accident shock
കൽപറ്റ: വയനാട് വൈത്തിരിയിൽ വോട്ട് ചെയ്ത് മടങ്ങുകയായിരുന്ന വയോധികയുടെ കാലിലൂടെ കെഎസ്ആർടിസി ബസ് കയറി ഇറങ്ങിയ സംഭവത്തിൽ ബസ് ജീവനക്കാർക്കെതിരെ ഗുരുതര ആരോപണവുമായി കുടുംബം രംഗത്ത്. വ്യാഴാഴ്ച വൈകീട്ട് ചിപ്പിലിത്തോട് വച്ചുണ്ടായ അപകടത്തിൽ വൈത്തിരി സ്വദേശിനി ജാനുവിനാണ് (65) തന്റെ ഒരു കാൽ നഷ്ടമായത്. ജാനു ബസിൽ നിന്ന് പൂർണ്ണമായും ഇറങ്ങുന്നതിന് മുൻപ് തന്നെ ഡ്രൈവർ ബസ് മുന്നോട്ട് എടുത്തതാണ് അപകടത്തിന് കാരണമായതെന്ന് യാത്രക്കാരും ബന്ധുക്കളും ആരോപിക്കുന്നു. വീഴ്ചയുടെ ആഘാതത്തിൽ ബസിനടിയിലേക്ക് തെറിച്ചുവീണ ജാനുവിന്റെ കാലിലൂടെ ചക്രങ്ങൾ കയറി ഇറങ്ങുകയായിരുന്നു. ഉടൻ തന്നെ കോഴിക്കോട് മെഡിക്കൽ കോളേജ് ആശുപത്രിയിൽ എത്തിച്ചെങ്കിലും പരിക്ക് അതീവ ഗുരുതരമായതിനാൽ ഡോക്ടർമാർക്ക് കാൽ മുറിച്ചുമാറ്റേണ്ടി വന്നു. അതേസമയം, തങ്ങളുടെ ഭാഗത്ത് വീഴ്ചയില്ലെന്നും ബസിൽ നിന്നിറങ്ങി നടക്കുന്നതിനിടെ വയോധിക കാൽ തെറ്റി വീണതാകാമെന്നുമാണ് ബസ് ജീവനക്കാരുടെ പ്രാഥമിക വിശദീകരണം. എന്നാൽ, ഡ്രൈവറുടെയും കണ്ടക്ടറുടെയും അശ്രദ്ധയാണ് ഒരു ജീവൻ തന്നെ അപകടത്തിലാക്കിയതെന്ന നിലപാടിൽ ഉറച്ചുനിൽക്കുകയാണ് ബന്ധുക്കൾ. കൃത്യമായ പരിശോധനകൾ നടത്താതെ ബസ് മുന്നോട്ട് എടുത്തതിനെതിരെ പോലീസിൽ പരാതി നൽകാനാണ് കുടുംബത്തിന്റെ തീരുമാനം. സംഭവത്തിൽ നാട്ടുകാരുടെ ഭാഗത്തുനിന്നും വലിയ പ്രതിഷേധമാണ് ഉയരുന്നത്.
About The Author
