Kochi Mayor Probe Shock
തനിക്കെതിരെ ഉയർന്നിട്ടുള്ള അഴിമതി ആരോപണങ്ങൾ രാഷ്ട്രീയ പ്രേരിതമാണെന്നും ഏത് തരത്തിലുള്ള അന്വേഷണത്തെയും നേരിടാൻ തയ്യാറാണെന്നും കൊച്ചി മേയർ അഡ്വ. വി.കെ. മിനിമോൾ. ജനകീയ പ്രശ്നങ്ങളിൽ ഇടപെടുമ്പോൾ സ്വീകരിക്കുന്ന ചില നിലപാടുകൾ സാങ്കേതികമായി നിയമപരമാകണമെന്നില്ലെന്നും എന്നാൽ താൻ അഴിമതി നടത്തിയിട്ടില്ലെന്നും അവർ വ്യക്തമാക്കി. 2018-19 കാലയളവിൽ പാലാരിവട്ടം കൗൺസിലറായിരിക്കെ റോഡ് നവീകരണത്തിനായി റസിഡന്റ്സ് അസോസിയേഷനിൽ നിന്ന് പണം കൈപ്പറ്റിയെന്ന പരാതിയിൽ വിജിലൻസ് അന്വേഷണത്തിന് കോടതി ഉത്തരവിട്ട പശ്ചാത്തലത്തിലാണ് മേയറുടെ പ്രതികരണം. തന്റെ ഭാഗം കേൾക്കാതെയാണ് പ്രാഥമിക അന്വേഷണം നടന്നതെന്നും ഔദ്യോഗിക ഉത്തരവ് ലഭിച്ചാലുടൻ നിയമപരമായ നടപടികളുമായി മുന്നോട്ട് പോകുമെന്നും മേയർ കൂട്ടിച്ചേർത്തു.
പാലാരിവട്ടത്തെ ഫ്ലാറ്റ് നിർമ്മാണവുമായി ബന്ധപ്പെട്ട് റോഡ് തകർന്നപ്പോൾ അത് പുനർനിർമ്മിക്കാൻ നിർമ്മാണ കമ്പനി നൽകിയ സെക്യൂരിറ്റി ഡിപ്പോസിറ്റിൽ നിന്ന് മൂന്ന് ലക്ഷം രൂപ മേയർ വ്യക്തിപരമായ അക്കൗണ്ടിലേക്ക് വാങ്ങിയെന്നാണ് പ്രധാന ആരോപണം. എന്നാൽ റോഡ് നിർമ്മാണം കോർപ്പറേഷൻ ഫണ്ട് ഉപയോഗിച്ചാണ് നടന്നതെന്ന് വിജിലൻസ് കണ്ടെത്തിയിരുന്നു. പരാതി ഉയർന്നതിനെത്തുടർന്ന് പണം തിരികെ നൽകിയെങ്കിലും, ഒരു പൊതുപ്രവർത്തക എന്ന നിലയിൽ പണം നേരിട്ട് കൈപ്പറ്റിയത് ക്രിമിനൽ ദുരുപയോഗമാണെന്ന് മൂവാറ്റുപുഴ വിജിലൻസ് കോടതി നിരീക്ഷിച്ചു. ഇതേത്തുടർന്നാണ് മേയർക്കെതിരെ വിശദമായ അന്വേഷണം നടത്താൻ കോടതി ഉത്തരവിട്ടത്. ഈ വിഷയത്തിൽ പ്രതിപക്ഷം ശക്തമായ പ്രതിഷേധവുമായി രംഗത്തെത്തിയിട്ടുണ്ട്.
About The Author
