Anganwadi Food Controversy: കുട്ടികൾക്ക് നൽകിയ....

അങ്കണവാടിയിൽ നിന്നും നൽകിയ പോഷകാഹാര പാക്കറ്റിൽ ചത്ത പാമ്പിൻകുഞ്ഞ്; മധ്യപ്രദേശിൽ വൻ സുരക്ഷാവീഴ്ച, അന്വേഷണത്തിന് ഉത്തരവ്

മധ്യപ്രദേശിലെ അങ്കണവാടിയിൽ നിന്നും കുട്ടികൾക്ക് വിതരണം ചെയ്ത പോഷകാഹാര പാക്കറ്റിൽ ചത്ത പാമ്പിൻകുഞ്ഞിനെ കണ്ടെത്തിയതായി ഞെട്ടിക്കുന്ന റിപ്പോർട്ട്. കുട്ടികളുടെ ആരോഗ്യ സംരക്ഷണത്തിനായി സർക്കാർ നൽകുന്ന ഭക്ഷണപ്പൊതിയിലാണ് ഈ വൻ സുരക്ഷാവീഴ്ച കണ്ടെത്തിയത്. പാക്കറ്റ് തുറന്ന് ഉപയോഗിക്കാൻ തുടങ്ങിയപ്പോഴാണ് ഉള്ളിൽ ചത്ത നിലയിൽ പാമ്പിൻകുഞ്ഞിനെ കണ്ടത്. സംഭവത്തെത്തുടർന്ന് പ്രകോപിതരായ രക്ഷിതാക്കളും നാട്ടുകാരും അങ്കണവാടിക്ക് മുന്നിൽ കടുത്ത പ്രതിഷേധവുമായി രംഗത്തെത്തി. കുട്ടികളുടെ ജീവൻ വെച്ച് കളിക്കുന്ന ഇത്തരം വീഴ്ചകൾക്ക് കാരണക്കാരായവർക്കെതിരെ കർശന നടപടി വേണമെന്നാണ് ഇവരുടെ ആവശ്യം. സംഭവം വലിയ വിവാദമായതോടെ ഉന്നത ഉദ്യോഗസ്ഥർ സ്ഥലത്തെത്തി പരിശോധന നടത്തുകയും, ഭക്ഷണ പാക്കറ്റുകൾ വിതരണം ചെയ്ത ഏജൻസിക്കെതിരെ അടിയന്തര അന്വേഷണത്തിന് ഉത്തരവിടുകയും ചെയ്തിട്ടുണ്ട്. ഭക്ഷ്യസുരക്ഷാ വിഭാഗവും സാമ്പിളുകൾ ശേഖരിച്ച് പരിശോധനയ്ക്കായി അയച്ചിരിക്കുകയാണ്. (Anganwadi Food Controversy)