Pakistan Army chief Asim Munir speaking about Operation Sindoor
ഇന്ത്യൻ സൈന്യം നടത്തിയ അതിശക്തമായ ‘ഓപ്പറേഷൻ സിന്ദൂർ’ സൈനിക നീക്കത്തിൽ പാകിസ്ഥാൻ തകർന്നടിഞ്ഞതിന്റെ ഒന്നാം വാർഷികത്തിൽ പ്രകോപനപരമായ പ്രസ്താവനയുമായി പാക് സൈനിക മേധാവി ഫീൽഡ് മാർഷൽ അസിം മുനീർ. പാകിസ്ഥാന്റെ പരമാധികാരത്തിന് നേരെ ഇനി ഏതെങ്കിലും തരത്തിലുള്ള സൈനിക നീക്കമുണ്ടായാൽ അതിന്റെ പ്രത്യാഘാതം ദൂരവ്യാപകവും വേദനാജനകവുമായിരിക്കുമെന്ന് മുനീർ ഭീഷണി മുഴക്കി. റാവൽപിണ്ടിയിലെ സൈനിക ആസ്ഥാനത്ത് വ്യോമസേനാ, നാവികസേനാ മേധാവികളുടെ സാന്നിധ്യത്തിൽ നടന്ന ചടങ്ങിലായിരുന്നു ഇന്ത്യയെ ലക്ഷ്യം വെച്ചുള്ള ഈ മുന്നറിയിപ്പ്. ശത്രുവിന്റെ നീക്കങ്ങളെ മുൻപത്തേക്കാൾ വേഗത്തിലും ശക്തിയിലും നേരിടുമെന്നും അദ്ദേഹം അവകാശപ്പെട്ടു.
കൂടുതൽ വിവരങ്ങൾ Media7news.com-ൽ വായിക്കുക.
ഔദ്യോഗിക വിവരങ്ങൾക്ക്
Inter-Services Public Relations
സന്ദർശിക്കാം.
കഴിഞ്ഞ വർഷം ഏപ്രിലിൽ പഹൽഗാമിൽ പാക് ഭീകരർ നടത്തിയ ആക്രമണത്തിന് മറുപടിയായാണ് ഇന്ത്യ ‘ഓപ്പറേഷൻ സിന്ദൂർ’ ആവിഷ്കരിച്ചത്. മെയ് 7-ന് രാത്രി പാക് അധീന കശ്മീരിലെ ഒമ്പത് ഭീകരതാവളങ്ങൾ തകർത്ത ഇന്ത്യൻ സൈന്യം, മെയ് 10-ഓടെ പാകിസ്ഥാന്റെ റഡാർ സംവിധാനങ്ങളും വിമാനത്താവളങ്ങളും തകർത്തുതരിപ്പണമാക്കിയിരുന്നു. ഇന്ത്യയുടെ ഈ മിന്നലാക്രമണത്തിൽ കനത്ത നാശനഷ്ടങ്ങൾ നേരിട്ടതോടെയാണ് പാകിസ്ഥാൻ വെടിനിർത്തലിന് അപേക്ഷിച്ചത്. ഈ കനത്ത പ്രഹരത്തിന്റെ മുറിവുകൾ ഉണങ്ങും മുൻപേയാണ് പാക് സൈനിക മേധാവി വീണ്ടും വെല്ലുവിളിയുമായി എത്തുന്നത്.
ഇവിടെ കാണുക
തിരിച്ചടി ഭയന്ന് പാകിസ്ഥാൻ നിരന്തരം ആണവായുധ ഭീഷണി മുഴക്കുന്നത് അന്താരാഷ്ട്ര തലത്തിൽ വലിയ ചർച്ചയായിട്ടുണ്ട്. രാജ്യം വീഴാൻ പോകുകയാണെന്ന് തോന്നിയാൽ ലോകത്തിന്റെ പകുതിയും കൂടെക്കൊണ്ടുപോകുമെന്നും സിന്ധു നദീതീരത്തെ ഇന്ത്യൻ നിർമ്മിതികൾ തകർക്കുമെന്നും അസിം മുനീർ മുൻപ് ഭീഷണിപ്പെടുത്തിയിരുന്നു. ഇന്ത്യയുടെ സൈനിക കരുത്തിന് മുന്നിൽ പതറി നിൽക്കുന്ന പാകിസ്ഥാൻ, തങ്ങളുടെ തകർച്ച മറച്ചുവെക്കാൻ ഇത്തരം പ്രകോപനപരമായ പ്രസ്താവനകൾ ആവർത്തിക്കുകയാണെന്ന് രാഷ്ട്രീയ നിരീക്ഷകർ വിലയിരുത്തുന്നു.
About The Author
