Kozhikode bus fire shock
കോഴിക്കോട്: നഗരത്തിൽ ഓടിക്കൊണ്ടിരുന്ന സ്വകാര്യ ബസിന് തീപിടിച്ചു. കോഴിക്കോട് – പെരുമണ്ണ റൂട്ടിൽ സർവീസ് നടത്തുന്ന ‘ഗ്യാലക്സി’ എന്ന ബസിനാണ് മാങ്കാവ് കടുപ്പിനിയിൽ വെച്ച് തീപിടുത്തമുണ്ടായത്. സിഎൻജി (CNG) ഇന്ധനമായി ഉപയോഗിക്കുന്ന ബസിലെ എൻജിൻ ഭാഗത്ത് നിന്ന് പുക ഉയരുന്നത് ശ്രദ്ധയിൽപ്പെട്ട ഉടൻ തന്നെ ഡ്രൈവർ ബസ് നിർത്തുകയും യാത്രക്കാരെ സുരക്ഷിതമായി പുറത്തിറക്കുകയും ചെയ്തു. ബസിൽ നിരവധി യാത്രക്കാരുണ്ടായിരുന്നെങ്കിലും ഡ്രൈവറുടെയും നാട്ടുകാരുടെയും സമയോചിതമായ ഇടപെടൽ മൂലം വൻ അപകടം ഒഴിവാകുകയായിരുന്നു. തീ പടരുന്നത് കണ്ടയുടനെ നാട്ടുകാരും ബസ് ജീവനക്കാരും ചേർന്ന് തീയണയ്ക്കാനുള്ള ശ്രമങ്ങൾ ആരംഭിച്ചു. തുടർന്ന് മീഞ്ചന്തയിൽ നിന്ന് അഗ്നിശമന സേനാംഗങ്ങൾ സ്ഥലത്തെത്തിയാണ് തീ പൂർണ്ണമായും നിയന്ത്രണവിധേയമാക്കിയത്. ഷോർട്ട് സർക്യൂട്ടാണോ അതോ ഗ്യാസ് ചോർച്ചയാണോ അപകടകാരണമെന്ന് കണ്ടെത്താൻ അധികൃതർ പരിശോധന നടത്തിവരികയാണ്. ജനവാസ മേഖലയിൽ വെച്ചുണ്ടായ അപകടമായിരുന്നിട്ടും യാത്രക്കാരെയെല്ലാം കൃത്യസമയത്ത് മാറ്റാൻ സാധിച്ചതാണ് വലിയൊരു ദുരന്തം ഒഴിവാക്കാൻ സഹായിച്ചത്.
About The Author
