Sreenanda Death Mystery
ചിക്കമഗളൂരു: കർണാടകയിലെ ചിക്കമഗളൂരുവിൽ വിനോദസഞ്ചാരത്തിനിടെ കാണാതാവുകയും പിന്നീട് മരിച്ച നിലയിൽ കണ്ടെത്തുകയും ചെയ്ത മലയാളി പെൺകുട്ടി ശ്രീനന്ദയുടെ മരണത്തിലെ ദുരൂഹത നീക്കാൻ അധികൃതർ നടപടി കടുപ്പിച്ചു. കേസിന്റെ ഗൗരവം കണക്കിലെടുത്ത് ശ്രീനന്ദയുടെ പോസ്റ്റ്മോർട്ടം പ്രത്യേക കേസായി പരിഗണിച്ച് ഇന്ന് തന്നെ പൂർത്തിയാക്കാൻ ചിക്കമഗളൂരു ജില്ലാ കളക്ടർ ഉത്തരവിട്ടു. സാധാരണ പോസ്റ്റ്മോർട്ടം സമയം കഴിഞ്ഞാലും നടപടികൾ പൂർത്തിയാക്കി മൃതദേഹം വിട്ടുനൽകാനാണ് നിർദേശം. ചിക്കമഗളൂരു ജില്ലാ ആശുപത്രിയിൽ നടക്കുന്ന പോസ്റ്റ്മോർട്ടത്തിന് ശേഷം മൃതദേഹം ഇന്ന് രാത്രിയോടെ തന്നെ നാട്ടിലേക്ക് കൊണ്ടുപോകുമെന്ന് ബന്ധുക്കൾ അറിയിച്ചു. പാലക്കാട് കടമ്പഴിപ്പുറം സ്വദേശികളായ രമേശ്-രോഹിണി ദമ്പതികളുടെ മകളായ ശ്രീനന്ദയെ നാല് ദിവസത്തെ വിപുലമായ തിരച്ചിലിനൊടുവിലാണ് മാണിക്കധാര വെള്ളച്ചാട്ടത്തിന് സമീപം 1500 അടി താഴ്ചയിലുള്ള കൊക്കയിൽ മരിച്ച നിലയിൽ കണ്ടെത്തിയത്.മരണത്തിൽ അസ്വാഭാവികതയുണ്ടെന്നും മകളെ തട്ടിക്കൊണ്ടുപോയതാകാമെന്നും കുടുംബം ഉന്നയിച്ച ആരോപണങ്ങൾ ഗൗരവത്തോടെയാണ് പൊലീസ് കാണുന്നത്. സംഭവസ്ഥലത്ത് സോകോ (SOCO) ടീമിന്റെ നേതൃത്വത്തിൽ വിദഗ്ധ പരിശോധനകൾ പുരോഗമിക്കുകയാണ്. തെർമൽ ഡ്രോണുകളുടെ സഹായത്തോടെയാണ് മൃതദേഹം കണ്ടെത്തിയത് എന്നതും നൂറിലധികം അംഗങ്ങളുള്ള സംഘം തിരച്ചിലിന് നേതൃത്വം നൽകിയതും കേസിന്റെ വ്യാപ്തി വ്യക്തമാക്കുന്നു. ശ്രീനന്ദയെ കാണാതായ സമയത്ത് പ്രദേശത്തുണ്ടായിരുന്ന മറ്റ് വിനോദസഞ്ചാരികളെ കേന്ദ്രീകരിച്ചും സിസിടിവി ദൃശ്യങ്ങൾ വഴിയും അന്വേഷണം നടക്കുന്നുണ്ട്. കുടുംബത്തിന്റെ പരാതിയിലെ ഒരു സാധ്യതയും തള്ളിക്കളയില്ലെന്നും ശാസ്ത്രീയമായ തെളിവുകളുടെ അടിസ്ഥാനത്തിൽ സത്യം പുറത്തുകൊണ്ടുവരുമെന്നും ചിക്കമഗളൂരു പൊലീസ് വ്യക്തമാക്കി.
About The Author
