Kerala Flood Row Shock
2018-ലെ പ്രളയം മനുഷ്യനിർമിതമാണെന്ന യുഡിഎഫ് ആരോപണങ്ങളെ തള്ളി മുഖ്യമന്ത്രി പിണറായി വിജയൻ. പ്രളയത്തിന്റെ ആധിക്യത്തെക്കുറിച്ചും മഴയുടെ ശക്തിയെക്കുറിച്ചും വിദഗ്ധ സമിതികൾ നടത്തിയ പഠനങ്ങൾ ഇത് പ്രകൃതിദുരന്തമാണെന്ന് വ്യക്തമാക്കിയതാണെന്നും രാഷ്ട്രീയ ലക്ഷ്യത്തോടെയുള്ള പ്രചാരണങ്ങൾ ജനങ്ങൾ വിശ്വസിക്കില്ലെന്നും അദ്ദേഹം പറഞ്ഞു. മാത്യു കുഴൽനാടൻ ഉന്നയിച്ച അഴിമതി ആരോപണങ്ങളെയും മന്ത്രി കെ. കൃഷ്ണൻകുട്ടിയുടെ ശബ്ദരേഖയെയും മുഖ്യമന്ത്രി തള്ളിക്കളഞ്ഞു. മുൻ മന്ത്രി ജി. സുധാകരന്റെ സമീപകാല നിലപാടുകളെ കടുത്ത ഭാഷയിലാണ് മുഖ്യമന്ത്രി വിമർശിച്ചത്. ശത്രുപക്ഷത്ത് ചേർന്ന സുധാകരൻ സ്വന്തം സഹോദരന്റെ രക്തസാക്ഷിത്വത്തെപ്പോലും അപമാനിക്കുകയാണെന്നും സി.എസ് സുജാതക്കെതിരെ നടത്തിയ സ്ത്രീവിരുദ്ധ പരാമർശങ്ങൾ രാഷ്ട്രീയ അധഃപതനത്തിന്റെ തെളിവാണെന്നും അദ്ദേഹം വ്യക്തമാക്കി. തിരഞ്ഞെടുപ്പ് പ്രചാരണങ്ങളിൽ തന്റെ ചിത്രം മാത്രം ഉപയോഗിക്കുന്നു എന്ന വിമർശനത്തിന്, പാർട്ടിയിൽ വ്യക്തി കേന്ദ്രീകൃതമായ നേതൃത്വമില്ലെന്നും കൂട്ടായ തീരുമാനങ്ങൾക്കാണെന്നും സർക്കാരിനെ നയിക്കുന്ന ആൾ എന്ന നിലയിലാണ് ചിത്രം വരുന്നതെന്നും അദ്ദേഹം മറുപടി നൽകി. യുഡിഎഫിന്റെ തിരഞ്ഞെടുപ്പ് വാഗ്ദാനങ്ങൾക്ക് വിശ്വാസ്യതയില്ലെന്നും മുണ്ടക്കൈ-ചൂരൽമല പുനരധിവാസ വിഷയങ്ങളിൽ നൽകിയ വാഗ്ദാനങ്ങൾ പാലിക്കാൻ കഴിയാത്തവർ പുതിയ ഉറപ്പുകൾ നൽകുന്നത് പരിഹാസ്യമാണെന്നും മുഖ്യമന്ത്രി കൂട്ടിച്ചേർത്തു.
About The Author
