Fake Medicine India Shock
രാജ്യത്ത് വ്യാജ ജീവൻരക്ഷാമരുന്നുകളുടെ വിപണനം ഭീതിജനകമായ രീതിയിൽ തുടരുന്നതായി കേന്ദ്ര ആരോഗ്യ മന്ത്രാലയത്തിന്റെ കണക്കുകൾ വ്യക്തമാക്കുന്നു. കഴിഞ്ഞ സാമ്പത്തിക വർഷം പരിശോധിച്ച സാംപിളുകളിൽ ആയിരക്കണക്കിന് മരുന്നുകൾ ഗുണനിലവാരമില്ലാത്തതാണെന്നും നൂറുകണക്കിന് മരുന്നുകൾ പൂർണ്ണമായും വ്യാജമാണെന്നും പാർലമെന്റിൽ സമർപ്പിച്ച റിപ്പോർട്ടിൽ പറയുന്നു. ആരോഗ്യ മന്ത്രാലയത്തിന്റെ കണക്കനുസരിച്ച് പരിശോധിച്ച 1,16,324 സാംപിളുകളിൽ 3104 എണ്ണം ഗുണനിലവാരമില്ലാത്തവയാണ്. ഇതിൽ 245 എണ്ണം പൂർണ്ണമായും വ്യാജമാണെന്ന് കണ്ടെത്തി. പ്രത്യേകിച്ച് കഫ് സിറപ്പുകളുടെ കാര്യത്തിൽ സ്ഥിതി അതീവ ഗുരുതരമാണ്; 3349 കഫ് സിറപ്പുകൾക്കാണ് ഗുണനിലവാരമില്ലെന്ന് കണ്ടെത്തിയത്. കഴിഞ്ഞ ദിവസം ഡൽഹിയിൽ പിടിയിലായ നിഖിൽ അറോറ എന്ന വ്യാജമരുന്ന് മൊത്തക്കച്ചവടക്കാരൻ പ്രതിവർഷം 5 കോടി രൂപ വരെയാണ് ഇത്തരത്തിൽ സമ്പാദിച്ചിരുന്നത്. ഇയാളുടെ ഗോഡൗണിൽ നിന്ന് 1,20,535 വ്യാജ ഗുളികകളും 50 കോടി രൂപയുടെ വ്യാജ ജി.എസ്.ടി ബില്ലുകളും പോലീസ് പിടിച്ചെടുത്തു. തമിഴ്നാട്ടിൽ വ്യാജ കഫ് സിറപ്പ് കഴിച്ച് കുട്ടികൾ മരിക്കാനിടയായ സംഭവം രാജ്യമനസ്സാക്ഷിയെ ഞെട്ടിച്ചിരുന്നു. മരുന്ന് പരിശോധനയിലെ അലംഭാവത്തെ സുപ്രീം കോടതിയും പലതവണ വിമർശിച്ചിട്ടുണ്ട്. ജനങ്ങളുടെ ജീവൻ വെച്ച് പന്താടുന്ന ഈ മാഫിയക്കെതിരെ കർശന നടപടി വേണമെന്ന ആവശ്യം ശക്തമാവുകയാണ്.
About The Author
