ET Tyson Master Boat Wave
നിയമസഭാ തിരഞ്ഞെടുപ്പ് പ്രചരണത്തിന്റെ ഭാഗമായി പറവൂർ മണ്ഡലത്തിലെ എൽഡിഎഫ് സ്ഥാനാർത്ഥി ഇ.ടി. ടൈസൺ മാസ്റ്റർക്കായി പെരിയാറിൽ വേറിട്ട പ്രചരണ യാത്ര സംഘടിപ്പിച്ചു. വള്ളംകളി മാതൃകയിൽ സംഘടിപ്പിച്ച ഈ ജലയാത്രയിൽ നൂറുകണക്കിന് മത്സ്യത്തൊഴിലാളികളാണ് തങ്ങളുടെ പ്രിയ സ്ഥാനാർത്ഥിക്ക് പിന്തുണയുമായി അണിനിരന്നത്. എട്ടു വർഷം മുൻപ് കേരളത്തെ നടുക്കിയ പ്രളയകാലത്ത് പറവൂരിന്റെ രക്ഷകരായി അവതരിച്ച കടലിന്റെ മക്കൾ, ഇത്തവണ രാഷ്ട്രീയ പോരാട്ടത്തിൽ തങ്ങളുടെ കരുത്ത് കാട്ടാനാണ് പുഴയിലിറങ്ങിയത്.
മൂത്തകുന്നിൽ നിന്നാണ് ആവേശകരമായ ഈ പ്രചരണ യാത്ര ആരംഭിച്ചത്. ചെങ്കൊടി ഏന്തിയ പന്ത്രണ്ടോളം മത്സ്യബന്ധന യാനങ്ങളാണ് ജലഘോഷയാത്രയിൽ അണിനിരന്നത്. ഓരോ വള്ളത്തിലും ആവേശഭരിതരായ പ്രവർത്തകർ സ്ഥാനാർത്ഥിക്കായി മുദ്രാവാക്യങ്ങൾ വിളിച്ചു. വള്ളത്തിന്റെ മുൻഭാഗത്ത് സ്ഥാനാർത്ഥി ഇ.ടി. ടൈസൺ മാസ്റ്ററും ഉണ്ടായിരുന്നു. തീരദേശ ജനതയുടെ സ്നേഹാദരങ്ങൾ ഏറ്റുവാങ്ങി പുഴയിലൂടെ നീങ്ങിയ ഈ പ്രചരണം മണ്ഡലത്തിലെ വോട്ടർമാരിലും വലിയ കൗതുകവും ആവേശവുമാണ് ഉണ്ടാക്കിയത്.
കൈപ്പമംഗലം എംഎൽഎ എന്ന നിലയിലുള്ള ടൈസൺ മാസ്റ്ററുടെ പ്രവർത്തന മികവും പ്രളയകാലത്തെ മത്സ്യത്തൊഴിലാളികളുടെ സേവനവും കോർത്തിണക്കിയുള്ള ഈ പ്രചരണ പരിപാടി വരും ദിവസങ്ങളിലും മണ്ഡലത്തിൽ സജീവ ചർച്ചയാകും. തീരദേശ മേഖലയിലെ വോട്ടുകൾ ഉറപ്പിക്കാൻ ലക്ഷ്യമിട്ടാണ് ഇത്തരമൊരു പരിപാടി എൽഡിഎഫ് നേതൃത്വം സംഘടിപ്പിച്ചത്.
About The Author
