Supreme Court Kerala Shock
കേരളത്തിലെ സ്പെഷ്യൽ എജുക്കേറ്റർമാരുടെ നിയമനവുമായി ബന്ധപ്പെട്ട കേസ് പരിഗണിക്കവെ സുപ്രീംകോടതിയിൽ നിന്ന് നിർണ്ണായകമായ പരാമർശങ്ങൾ ഉണ്ടായിരിക്കുന്നു. സംസ്ഥാനത്ത് ഭരണമാറ്റം ഉണ്ടായാൽ നിലവിലെ പ്രശ്നങ്ങൾക്ക് പരിഹാരമാകുമോ എന്നാണ് ജസ്റ്റിസ് ദീപാങ്കർ ദത്ത അധ്യക്ഷനായ ബെഞ്ച് ഹർജിക്കാരോട് ആരാഞ്ഞത്. ഇടത് അധ്യാപക സംഘടനയായ കെ.എസ്.ടി.എയുടെ ഭാഗമായ കേരള റിസോഴ്സ് ടീച്ചേഴ്സ് അസോസിയേഷൻ നൽകിയ ഹർജി പരിഗണിക്കവേയായിരുന്നു കോടതിയുടെ ഈ ചോദ്യം. കേരളത്തിൽ നിയമസഭാ തെരഞ്ഞെടുപ്പ് ഘട്ടം അടുത്തുവരുന്ന പശ്ചാത്തലത്തിൽ, രാഷ്ട്രീയ മാറ്റങ്ങൾ സ്പെഷ്യൽ എജുക്കേറ്റർമാരുടെ ജോലി സ്ഥിരതയെയും ആനുകൂല്യങ്ങളെയും എങ്ങനെ ബാധിക്കുമെന്ന നിരീക്ഷണമാണ് കോടതി നടത്തിയത്.
സ്പെഷ്യൽ എജുക്കേറ്റർമാരുടെ നിയമന പ്രതിസന്ധിക്ക് കാരണം കേന്ദ്ര സർക്കാരിൽ നിന്ന് സമഗ്ര ശിക്ഷാ കേരള (SSK) ഫണ്ട് ലഭിക്കാത്തതാണെന്ന് സംസ്ഥാന സർക്കാർ കോടതിയിൽ വാദിച്ചു. ഫണ്ട് ലഭ്യത ഇല്ലാത്തതിനാൽ അധ്യാപകർക്ക് സ്ഥിരനിയമനം നൽകാൻ കഴിയില്ലെന്ന നിലപാടാണ് സർക്കാർ സത്യവാങ്മൂലത്തിലൂടെ അറിയിച്ചിരിക്കുന്നത്. എന്നാൽ തെരഞ്ഞെടുപ്പ് ലക്ഷ്യം വെച്ചാണ് ഹർജിക്കാർ ഇപ്പോൾ കോടതിയിൽ കടുത്ത നിലപാട് സ്വീകരിക്കുന്നതെന്ന് സർക്കാർ അഭിഭാഷകർ ആരോപിച്ചു. ഈ വാദങ്ങൾക്കിടയിലാണ് കോടതി തിരഞ്ഞെടുപ്പ് തീയതിയെക്കുറിച്ച് അന്വേഷിക്കുകയും ഭരണമാറ്റം പരിഹാരമാകുമോ എന്ന് ചോദിക്കുകയും ചെയ്തത്.
സംസ്ഥാന സർക്കാരിന്റെ വാദങ്ങൾ കണക്കിലെടുത്ത സുപ്രീംകോടതി, ഫണ്ട് വിതരണവുമായി ബന്ധപ്പെട്ട കാര്യങ്ങളിൽ വ്യക്തത വരുത്താൻ കേന്ദ്ര സർക്കാരിനോട് നിർദ്ദേശിച്ചിട്ടുണ്ട്. കേന്ദ്രം തങ്ങളുടെ മറുപടി സത്യവാങ്മൂലമായി സമർപ്പിക്കണമെന്നും കോടതി ആവശ്യപ്പെട്ടു. സ്പെഷ്യൽ എജുക്കേറ്റർമാരുടെ സേവനം ഉറപ്പാക്കുന്നതിൽ കേന്ദ്ര-സംസ്ഥാന സർക്കാരുകൾ തമ്മിലുള്ള തർക്കം അധ്യാപകരുടെ ഭാവിയെ ബാധിക്കുന്ന സാഹചര്യത്തിൽ സുപ്രീംകോടതിയുടെ അടുത്ത ഇടപെടൽ ഏറെ നിർണ്ണായകമാകും.
About The Author
