Romi Bhinder Controversy
രാജസ്ഥാൻ റോയൽസ് മാനേജർ റോമി ഭിന്ദർ കുരുക്കിൽ; ഡഗ് ഔട്ടിൽ ഫോൺ ഉപയോഗിച്ചതിൽ ബിസിസിഐ അന്വേഷണം
ഐപിഎല്ലിൽ രാജസ്ഥാൻ റോയൽസ് മാനേജർ റോമി ഭിന്ദർ ചട്ടങ്ങൾ ലംഘിച്ച് ഡഗ് ഔട്ടിൽ മൊബൈൽ ഫോൺ ഉപയോഗിച്ചത് വലിയ വിവാദമാകുന്നു. ഗുവാഹത്തിയിൽ റോയൽ ചലഞ്ചേഴ്സ് ബെംഗളൂരുവിനെതിരായ മത്സരത്തിനിടെയാണ് സംഭവം. ടീമിലെ യുവതാരം വൈഭവ് സൂര്യവംശിക്കൊപ്പം ഇരുന്നുകൊണ്ട് റോമി ഭിന്ദർ ഫോൺ ഉപയോഗിക്കുന്ന ദൃശ്യങ്ങൾ സോഷ്യൽ മീഡിയയിൽ വൈറലായതോടെ ബിസിസിഐയുടെ ആന്റി കറപ്ഷൻ ആൻഡ് സെക്യൂരിറ്റി യൂണിറ്റ് (ACSU) അന്വേഷണം ആരംഭിച്ചു. ഐപിഎൽ നിയമപ്രകാരം കളിക്കാർക്കും ഒഫീഷ്യൽസിനുമുള്ള പ്രത്യേക മേഖലയിൽ (PMOA) മൊബൈൽ ഫോൺ ഉപയോഗിക്കുന്നതിന് കർശന നിരോധനമുണ്ട്. മാനേജർമാർക്ക് ഡ്രസ്സിംഗ് റൂമിൽ ഫോൺ ഉപയോഗിക്കാൻ അനുവാദമുണ്ടെങ്കിലും ഡഗ് ഔട്ടിൽ ഇത് പൂർണ്ണമായും നിരോധിച്ചിട്ടുള്ളതാണ്.
സംഭവത്തിൽ റോമി ഭിന്ദർ തന്റെ വിശദീകരണം ബിസിസിഐക്ക് മുന്നിൽ സമർപ്പിച്ചു. ആരോഗ്യപരമായ കാരണങ്ങളാലാണ് താൻ ഫോൺ ഉപയോഗിച്ചതെന്നാണ് ലഭിക്കുന്ന സൂചനകൾ. അദ്ദേഹത്തിന് അടുത്തിടെ ശ്വാസകോശ സംബന്ധമായ അസുഖങ്ങളും ആസ്ത്മയും അനുഭവപ്പെട്ടിരുന്നുവെന്നും, ഡ്രസ്സിംഗ് റൂമിലേക്ക് നിരന്തരം നടന്നുപോകാൻ ബുദ്ധിമുട്ടുള്ളതിനാലാണ് ഡഗ് ഔട്ടിലിരുന്ന് അത്യാവശ്യ ആശയവിനിമയം നടത്തിയതെന്നും പറയപ്പെടുന്നു. എന്നിരുന്നാലും, അഴിമതി വിരുദ്ധ ചട്ടങ്ങളുടെ ലംഘനമായതിനാൽ വിഷയത്തെ ബിസിസിഐ ഗൗരവമായാണ് കാണുന്നത്. അന്വേഷണ റിപ്പോർട്ടിന്റെ അടിസ്ഥാനത്തിൽ താക്കീതോ അതല്ലെങ്കിൽ സസ്പെൻഷനോ ഉൾപ്പെടെയുള്ള നടപടികൾ അദ്ദേഹത്തിനെതിരെ ഉണ്ടായേക്കാം.
About The Author
