Perumathura Booth Clash
തിരുവനന്തപുരം ജില്ലയിലെ പെരുമാതുറയിൽ വോട്ടെടുപ്പിനിടെ രാഷ്ട്രീയ പ്രവർത്തകർ തമ്മിൽ ശക്തമായ സംഘർഷം. സിപിഎം പ്രവർത്തകർ സംഘടിതമായി ബൂത്തിൽ അതിക്രമിച്ചു കയറി വോട്ട് തടസ്സപ്പെടുത്താൻ ശ്രമിച്ചുവെന്ന ആരോപണത്തെത്തുടർന്നാണ് സംഘർഷം പൊട്ടിപ്പുറപ്പെട്ടത്. ബൂത്തിനകത്ത് പ്രവർത്തകർ കയറിയതോടെ മറ്റ് രാഷ്ട്രീയ പാർട്ടികൾ ഇതിനെ ചോദ്യം ചെയ്യുകയും ഇത് വാക്കേറ്റത്തിലും പിന്നീട് വലിയ തോതിലുള്ള കൈയ്യാങ്കളിയിലും കലാശിക്കുകയുമായിരുന്നു. സ്ഥിതിഗതികൾ നിയന്ത്രണാതീതമായതോടെ സ്ഥലത്തുണ്ടായിരുന്ന പോലീസ് ഉദ്യോഗസ്ഥർ പ്രവർത്തകരെ പിരിച്ചുവിടാൻ ലാത്തിവീശി. പോലീസിന്റെ ഇടപെടലിനെത്തുടർന്ന് സംഘർഷാവസ്ഥയ്ക്ക് താൽക്കാലിക ശമനമുണ്ടായെങ്കിലും പ്രദേശത്ത് നേരിയ പിരിമുറുക്കം നിലനിന്നിരുന്നു. സംഘർഷത്തെത്തുടർന്ന് അല്പസമയം തടസ്സപ്പെട്ട വോട്ടെടുപ്പ്, കൂടുതൽ സുരക്ഷാ സേനയെ വിന്യസിച്ച ശേഷമാണ് പുനരാരംഭിച്ചത്. വോട്ടർമാർക്ക് ഭയമില്ലാതെ വോട്ട് ചെയ്യാനുള്ള സാഹചര്യം ഒരുക്കിയതായും ബൂത്തിനുള്ളിൽ ക്രമക്കേടുകൾ നടന്നിട്ടുണ്ടോ എന്ന് പരിശോധിക്കുമെന്നും അധികൃതർ അറിയിച്ചു. കനത്ത പോലീസ് കാവലിൽ നിശ്ചിത സമയത്തിനുള്ളിൽ തന്നെ പെരുമാതുറയിലെ ഈ ബൂത്തിൽ വോട്ടെടുപ്പ് നടപടികൾ പൂർത്തിയായി. സംഭവത്തിൽ കണ്ടാലറിയാവുന്ന ഏതാനും പേർക്കെതിരെ പോലീസ് കേസെടുത്തിട്ടുണ്ട്.
About The Author
