Monalisa Pocso Shock
കുംഭമേളയിലൂടെ സോഷ്യൽ മീഡിയയിൽ തരംഗമായ മൊണാലിസയുടെ വിവാഹം നിയമക്കുരുക്കിലേക്ക്. വിവാഹ സമയത്ത് പെൺകുട്ടിക്ക് പ്രായപൂർത്തിയായിരുന്നില്ലെന്നും വെറും 16 വയസ്സ് മാത്രമായിരുന്നു പ്രായമെന്നും ദേശീയ പട്ടികവർഗ്ഗ കമ്മീഷൻ നടത്തിയ അന്വേഷണത്തിൽ കണ്ടെത്തി. ഇതിന്റെ അടിസ്ഥാനത്തിൽ ഭർത്താവ് ഫർമാൻ ഖാനെതിരെ മധ്യപ്രദേശ് പോലീസ് പോക്സോ (POCSO) നിയമപ്രകാരം കേസെടുത്തു. മധ്യപ്രദേശിലെ മഹേശ്വർ ഗ്രാമപഞ്ചായത്ത് ഓഫീസിൽ നിന്നുള്ള രേഖകൾ പ്രകാരം മൊണാലിസയുടെ ജനനത്തീയതി 2009 ഡിസംബർ 30 ആണ്. ഇതനുസരിച്ച് 2026 മാർച്ചിൽ കേരളത്തിൽ വെച്ച് വിവാഹം നടക്കുമ്പോൾ പെൺകുട്ടിക്ക് 16 വയസ്സും രണ്ട് മാസവും മാത്രമായിരുന്നു പ്രായം.
കേരളത്തിലെ തിരുവനന്തപുരം ജില്ലയിലുള്ള പൂവാറിലെ ഒരു ക്ഷേത്രത്തിൽ വെച്ചായിരുന്നു ഇവരുടെ വിവാഹം നടന്നത്. വിവാഹത്തിനായി ഉപയോഗിച്ച ജനന സർട്ടിഫിക്കറ്റ് വ്യാജമാണെന്നും അന്വേഷണത്തിൽ തെളിഞ്ഞു. 2008-ൽ ജനിച്ചുവെന്ന് കാണിക്കുന്ന വ്യാജ രേഖകൾ ചമച്ചാണ് വിവാഹം രജിസ്റ്റർ ചെയ്തത്. ദേശീയ പട്ടികവർഗ്ഗ കമ്മീഷൻ ചെയർമാൻ അന്തർ സിംഗ് ആര്യയുടെ നേതൃത്വത്തിൽ നടന്ന അന്വേഷണമാണ് ഈ വിവരങ്ങൾ പുറത്തുകൊണ്ടുവന്നത്. സംഭവത്തിൽ മധ്യപ്രദേശ്, കേരള പോലീസ് മേധാവികളോട് നേരിട്ട് ഹാജരാകാൻ കമ്മീഷൻ നിർദ്ദേശിച്ചിട്ടുണ്ട്. നിലവിൽ ഫർമാൻ ഖാനെതിരെ പോക്സോ വകുപ്പിന് പുറമെ ക്രിമിനൽ ഗൂഢാലോചന, പട്ടികജാതി-പട്ടികവർഗ്ഗ പീഡന നിരോധന നിയമം എന്നിവയും ചുമത്തിയിട്ടുണ്ട്.
About The Author
