Mayyil Clash Violence Shock
കണ്ണൂർ മയ്യിലിൽ സി.പി.എം പ്രവർത്തകന് കുത്തേറ്റതിന് പിന്നാലെ മേഖലയിൽ വ്യാപക അക്രമസംഭവങ്ങൾ അരങ്ങേറി. മുള്ളക്കൊടിയിൽ വോട്ടെടുപ്പ് ദിവസം വൈകുന്നേരമുണ്ടായ തർക്കമാണ് അക്രമത്തിൽ കലാശിച്ചത്. എൽ.ഡി.എഫ് ബൂത്ത് ഏജന്റായിരുന്ന കുറ്റിച്ചിറ സ്വദേശി പി.പി. പ്രകാശനാണ് (52) കുത്തേറ്റത്. മുള്ളക്കൊടി യു.പി സ്കൂളിന് സമീപം വെച്ച് വ്യാഴാഴ്ച വൈകുന്നേരമാണ് സംഭവം നടന്നത്. തിരഞ്ഞെടുപ്പ് ഡ്യൂട്ടി കഴിഞ്ഞ് മടങ്ങുകയായിരുന്നു പ്രകാശൻ. പരിക്കേറ്റ ഇദ്ദേഹത്തെ കണ്ണൂരിലെ സ്വകാര്യ ആശുപത്രിയിൽ പ്രവേശിപ്പിച്ചു. സംഭവവുമായി ബന്ധപ്പെട്ട് യു.ഡി.എഫ് ഏജന്റിന്റെ സഹോദരനായ പി. കൃഷ്ണനെ പൊലീസ് അറസ്റ്റ് ചെയ്തിട്ടുണ്ട്.
സി.പി.എം പ്രവർത്തകന് കുത്തേറ്റ വാർത്ത പരന്നതോടെ മയ്യിൽ ടൗണിലും പരിസരപ്രദേശങ്ങളിലുമുള്ള കോൺഗ്രസ് ഓഫീസുകൾക്ക് നേരെ ആക്രമണമുണ്ടായി. മയ്യിൽ മണ്ഡലം കോൺഗ്രസ് കമ്മിറ്റി ഓഫീസ് ഉൾപ്പെടെയുള്ളവ അക്രമികൾ തകർത്തു. ഓഫീസിന്റെ ജനൽ ചില്ലുകളും വാതിലുകളും തകർക്കുകയും അകത്തുണ്ടായിരുന്ന ഫർണിച്ചറുകളും നേതാക്കളുടെ ഫോട്ടോകളും നശിപ്പിക്കുകയും ചെയ്തിട്ടുണ്ട്. സി.പി.എം പ്രവർത്തകരാണ് അക്രമത്തിന് പിന്നിലെന്ന് കോൺഗ്രസ് നേതൃത്വം ആരോപിച്ചു. സംഘർഷാവസ്ഥ കണക്കിലെടുത്ത് മയ്യിൽ മേഖലയിൽ വൻ പൊലീസ് സന്നാഹത്തെ വിന്യസിച്ചിട്ടുണ്ട്. രാഷ്ട്രീയ പകപോക്കലിന്റെ ഭാഗമായി നടന്ന അക്രമങ്ങളെ പൊലീസ് ഗൗരവത്തോടെയാണ് കാണുന്നതെന്നും കുറ്റവാളികൾക്കെതിരെ കർശന നടപടി സ്വീകരിക്കുമെന്നും അധികൃതർ അറിയിച്ചു.
About The Author
