Hamdan bin Mohammed Al Maktoum Visits Dubai Mall Amid Concerns
പശ്ചിമേഷ്യയിലെ സംഘർഷഭരിതമായ സാഹചര്യങ്ങൾക്കിടയിലും ജനങ്ങൾക്ക് ആത്മവിശ്വാസവും കരുത്തും പകർന്ന് ദുബായ് കിരീടാവകാശി ശൈഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂമും ദുബായ് ഒന്നാം ഉപഭരണാധികാരി ശൈഖ് മക്തൂം ബിൻ മുഹമ്മദ് ബിൻ റാഷിദ് അൽ മക്തൂമും ദുബായ് മാൾ സന്ദർശിച്ചു. തിങ്കളാഴ്ചയായിരുന്നു ഭരണാധികാരികളുടെ ഈ അപ്രതീക്ഷിത സന്ദർശനം. സാധാരണക്കാരിലൊരാളായി മാളിലെത്തിയ ഇരുവരും സന്ദർശകർക്കും താമസക്കാർക്കുമൊപ്പം സമയം ചെലവഴിക്കുകയും അവരോട് വിശേഷങ്ങൾ പങ്കുവെക്കുകയും ചെയ്തു.
ലോകത്തെ ഏറ്റവും തിരക്കേറിയ കേന്ദ്രങ്ങളിലൊന്നായ ദുബായ് മാളിൽ പ്രിയ നേതാക്കളുടെ സാന്നിധ്യം കണ്ടതോടെ സന്ദർശകർ ആവേശത്തിലായി. മേഖലയിലെ സുരക്ഷാ ഭീഷണികളെക്കുറിച്ചുള്ള ആശങ്കകൾക്കിടയിൽ, ദുബായിലെ ജീവിതം പൂർണ്ണമായും സാധാരണ നിലയിലാണെന്ന വ്യക്തമായ സന്ദേശമാണ് ഈ സന്ദർശനം നൽകുന്നത്. ഭരണാധികാരികൾ ജനങ്ങളുമായി പുലർത്തുന്ന അടുത്ത ബന്ധവും ദുബായുടെ സുരക്ഷയിലുള്ള അടിയുറച്ച ആത്മവിശ്വാസവുമാണ് ഇതിലൂടെ ഒരിക്കൽ കൂടി പ്രകടമായത്.
തങ്ങളുടെ പ്രിയപ്പെട്ട ‘ഫാസ’യെ (Fazza) അടുത്തു കണ്ട സന്തോഷം നിരവധി പേർ സോഷ്യൽ മീഡിയയിലൂടെ പങ്കുവെച്ചു. സുരക്ഷയും സമാധാനവും ദുബായുടെ മുഖമുദ്രയാണെന്നും ഏത് സാഹചര്യത്തിലും തങ്ങളുടെ ഭരണാധികാരികൾ ജനങ്ങൾക്കൊപ്പമുണ്ടെന്നും അടിവരയിടുന്നതായിരുന്നു ഈ സന്ദർശനം.
https://www.instagram.com/media7onlive/p/DWjB82XE3ab/
About The Author
