Bengal Voter List Row
കൊൽക്കത്ത: പശ്ചിമ ബംഗാൾ നിയമസഭാ തിരഞ്ഞെടുപ്പിന് മുന്നോടിയായി കേന്ദ്ര തിരഞ്ഞെടുപ്പ് കമ്മീഷൻ നടത്തിയ തീവ്ര വോട്ടർ പട്ടിക പരിഷ്കരണത്തിൽ ഏകദേശം 91 ലക്ഷം വോട്ടർമാരെ പട്ടികയിൽ നിന്ന് ഒഴിവാക്കി. മരണപ്പെട്ടവർ, സ്ഥിരമായി താമസം മാറിയവർ, ഇരട്ടിപ്പുള്ളവർ എന്നിവരെ ഒഴിവാക്കുന്നതിനായി നടത്തിയ പ്രത്യേക നടപടിയിലാണ് ഇത്രയും വലിയ മാറ്റം സംഭവിച്ചത്. ഏകദേശം 90.83 ലക്ഷം പേരാണ് ഇതോടെ പട്ടികയ്ക്ക് പുറത്തായത്. രണ്ട് ഘട്ടങ്ങളിലായാണ് ഈ ഒഴിവാക്കൽ പ്രക്രിയ നടന്നത്. ആദ്യ ഘട്ടത്തിൽ 63 ലക്ഷത്തോളം പേരെയാണ് ഒഴിവാക്കിയത്. തുടർന്ന് ഹൈക്കോടതിയുടെ മേൽനോട്ടത്തിൽ 705 ജുഡീഷ്യൽ ഓഫീസർമാർ നടത്തിയ സൂക്ഷ്മ പരിശോധനയിൽ (Adjudication) ബാക്കി 27 ലക്ഷത്തോളം പേർ കൂടി അയോഗ്യരാണെന്ന് കണ്ടെത്തി. മുർഷിദാബാദ്, നോർത്ത് 24 പർഗാനാസ്, മാൾഡ, സൗത്ത് 24 പർഗാനാസ് എന്നീ ജില്ലകളിലാണ് ഏറ്റവും കൂടുതൽ വോട്ടർമാർ പട്ടികയിൽ നിന്ന് പുറത്തായത്.വോട്ടർ പട്ടികയിലെ ഈ വൻ കുറവ് വരാനിരിക്കുന്ന തിരഞ്ഞെടുപ്പിൽ വലിയ രാഷ്ട്രീയ പ്രത്യാഘാതങ്ങൾ ഉണ്ടാക്കുമെന്നാണ് വിലയിരുത്തപ്പെടുന്നത്. അർഹരായ വോട്ടർമാർ പട്ടികയിൽ നിന്ന് പുറത്തായിട്ടുണ്ടെന്ന് തൃണമൂൽ കോൺഗ്രസ് ആരോപിക്കുമ്പോൾ, വ്യാജ വോട്ടർമാരെ ഒഴിവാക്കാനുള്ള അനിവാര്യമായ നടപടിയാണിതെന്നാണ് ബിജെപിയുടെ പക്ഷം. നിലവിൽ ഒഴിവാക്കപ്പെട്ടവർക്ക് അപ്പീൽ നൽകാൻ ട്രിബ്യൂണലുകളെ സമീപിക്കാവുന്നതാണ്. ഏപ്രിൽ 23, 29 തീയതികളിലായി രണ്ട് ഘട്ടമായാണ് ബംഗാളിൽ വോട്ടെടുപ്പ് നടക്കുന്നത്.
About The Author
