Pathanamthitta School Roof: ശക്തമായ കാറ്റിൽ മേൽക്കൂര...

പത്തനംതിട്ടയിൽ ശക്തമായ കാറ്റിൽ സ്‌കൂളിന്റെ മേൽക്കൂര പറന്നുപോയി; ഞായറാഴ്ചയായതിനാൽ ഒഴിവായത് വൻ ദുരന്തം

പത്തനംതിട്ട തണ്ണിത്തോടിൽ ശക്തമായ കാറ്റിൽ സ്‌കൂൾ കെട്ടിടത്തിന്റെ മേൽക്കൂര പറന്നുപോയി. തണ്ണിത്തോട് സെന്റ് ബെനഡിക്ട് എം.എസ്.സി.എച്ച്.എസ് (St. Benedict MSCHSS) സ്‌കൂളിലാണ് ഞായറാഴ്ച ഉച്ചയ്ക്ക് പന്ത്രണ്ട് മണിയോടെ നാടിനെ നടുക്കിയ സംഭവം ഉണ്ടായത്. ശക്തമായ കാറ്റിൽ കെട്ടിടത്തിന് മുകളിലെ ഷീറ്റുകൾ ഉൾപ്പെടെയുള്ള മേൽക്കൂര പൂർണ്ണമായും വേർപെട്ട് തൊട്ടടുത്ത വീടിന് മുകളിലേക്ക് പതിക്കുകയായിരുന്നു. ഞായറാഴ്ചയായതിനാൽ സ്‌കൂളിൽ കുട്ടികളോ അധ്യാപകരോ ഇല്ലാതിരുന്നതിനാലാണ് വൻ ദുരന്തം തലനാരിഴയ്ക്ക് ഒഴിവായത്. കനത്ത കാറ്റിലും മഴയിലും മേൽക്കൂര അടുത്തുള്ള വീടിന് മുകളിലേക്ക് വീണെങ്കിലും അവിടെയും ആളപായമൊന്നും റിപ്പോർട്ട് ചെയ്തിട്ടില്ല. സംഭവത്തെത്തുടർന്ന് പത്തനംതിട്ടയിലെ വിവിധ ദുരന്തനിവാരണ വിഭാഗങ്ങളും ജനപ്രതിനിധികളും സ്ഥലത്തെത്തി സ്ഥിതിഗതികൾ വിലയിരുത്തി വരികയാണ്. (Pathanamthitta School Roof)