Mohanlal Drishyam 3 advance booking box office update
മലയാള സിനിമ ലോകം ഏറ്റവും ആവേശത്തോടെ കാത്തിരിക്കുന്ന മോഹൻലാൽ ചിത്രം ‘ദൃശ്യം 3’ ബോക്സ് ഓഫീസിൽ വിസ്മയങ്ങൾ സൃഷ്ടിക്കാനൊരുങ്ങുന്നു. മെയ് 21-ന് ലോകവ്യാപകമായി തിയറ്ററുകളിൽ എത്താനിരിക്കുന്ന ചിത്രത്തിന്റെ ആദ്യ ഘട്ട അഡ്വാൻസ് ബുക്കിംഗ് കണക്കുകളാണ് ഇപ്പോൾ പുറത്തുവന്നിരിക്കുന്നത്. ഇന്ത്യയിൽ ഔദ്യോഗിക ബുക്കിംഗ് ആരംഭിച്ചിട്ടില്ലെങ്കിലും വിദേശ മാർക്കറ്റുകളിൽ റിലീസിന് രണ്ടാഴ്ച മുൻപേ വൻ തരംഗമാണ് ജോർജുകുട്ടിയും കുടുംബവും സൃഷ്ടിക്കുന്നത്. പ്രീമിയർ ഷോകളുടെയും ആദ്യ ദിന ഷോകളുടെയും ടിക്കറ്റ് വിൽപ്പനയിലൂടെ ഇതിനകം 75,000 ഡോളറിലധികം (ഏകദേശം 70.8 ലക്ഷം രൂപ) ചിത്രം നേടിക്കഴിഞ്ഞു. ആദ്യ വാരാന്ത്യത്തിലേക്കുള്ള ആഗോള ബുക്കിംഗ് 1.15 ലക്ഷം ഡോളർ പിന്നിട്ടതായാണ് ബോക്സ് ഓഫീസ് ട്രാക്കർമാർ നൽകുന്ന സൂചന.
കേരളത്തിലെ ഫാൻസ് ഷോകളുടെ ടിക്കറ്റ് വിൽപ്പന കൂടി കണക്കിലെടുക്കുമ്പോൾ, റിലീസിന് മുൻപേ ചിത്രം 1.50 കോടി രൂപയുടെ ബിസിനസ്സ് പൂർത്തിയാക്കി കഴിഞ്ഞു. പോസിറ്റീവ് റിപ്പോർട്ടുകൾ വരുന്ന പക്ഷം പൃഥ്വിരാജ് ചിത്രം ‘എമ്പുരാന്റെ’ റെക്കോർഡുകൾ പോലും ദൃശ്യം 3 തകർക്കുമെന്നാണ് സിനിമാ നിരീക്ഷകരുടെ വിലയിരുത്തൽ. മോഹൻലാലിന്റെ ജന്മദിനമായ മെയ് 21-ന് റിലീസ് ചെയ്യുന്ന ചിത്രം മലയാളത്തിന് പുറമെ ബോളിവുഡിലെ പ്രമുഖ സ്റ്റുഡിയോകളുടെ സഹകരണത്തോടെയാണ് ആഗോളതലത്തിൽ പ്രദർശനത്തിന് എത്തുന്നത്. മുൻപ് ഏപ്രിലിൽ റിലീസ് നിശ്ചയിച്ചിരുന്ന ചിത്രം പ്രേക്ഷകരുടെ കാത്തിരിപ്പിന് വിരാമമിട്ട് മെയ് മാസത്തിലേക്ക് മാറ്റുകയായിരുന്നു.
About The Author
