Shon George Church Row
സീറോ മലബാർ സഭാ ആസ്ഥാനത്ത് മാർ റാഫേൽ തട്ടിലുമായി കൂടിക്കാഴ്ച നടത്തിയശേഷം ബിജെപി നേതാവ് ഷോൺ ജോർജ് നടത്തിയ പ്രതികരണങ്ങൾ രാഷ്ട്രീയ-മതവൃത്തങ്ങളിൽ ശ്രദ്ധേയമാകുന്നു. താൻ സഭയെ ഒരിക്കലും വിമർശിച്ചിട്ടില്ലെന്നും സഭയുമായി ബിജെപി നല്ല ബന്ധമാണ് പുലർത്തുന്നതെന്നും ഷോൺ ജോർജ് വ്യക്തമാക്കി. ബിജെപിയുടെ ക്രൈസ്തവ ലെയ്സൺ വർക്കിന്റെ സംസ്ഥാന ചുമതല വഹിക്കുന്നയാൾ എന്ന നിലയിലാണ് താൻ നേതൃത്വത്തെ കണ്ടത്. സഭാനേതൃത്വവും ദീപിക പത്രവും പി.സി. ജോർജിനെ വേണ്ടത്ര പരിഗണിക്കുന്നില്ലെന്ന പരാതി സഭയെ അറിയിച്ചിട്ടുണ്ടെന്നും, ആരെങ്കിലും പ്രകോപിപ്പിച്ചാൽ പി.സി. ജോർജിന്റെ പ്രതികരണങ്ങൾ സ്വാഭാവികമാണെന്നും അദ്ദേഹം ന്യായീകരിച്ചു. ദീപിക പത്രത്തിൽ വരുന്നത് സഭയുടെ ഔദ്യോഗിക നിലപാടല്ലെന്നും അതിൽ ഓഹരിയുടമകളുടെ താല്പര്യങ്ങൾ ഉൾപ്പെടാറുണ്ടെന്നും അദ്ദേഹം കൂട്ടിച്ചേർത്തു. എഫ്.സി.ആർ.എ. ഭേദഗതി വിഷയത്തിൽ കേന്ദ്രസർക്കാർ സ്വീകരിച്ച നിലപാട് സഭയോടുള്ള ബിജെപിയുടെ നല്ല സമീപനത്തിന്റെ തെളിവാണെന്നും, ഭാവിയിൽ സഭയുടെ നിലപാട് ബിജെപിക്ക് അനുകൂലമായിരിക്കുമെന്നും ഷോൺ ജോർജ് ഉറപ്പിച്ചു പറഞ്ഞു.
About The Author
