Sreenanda death Shock Farewell
പാലക്കാട്: ആഗ്രഹിച്ച യാത്ര മരണത്തിലേക്കുള്ള വഴിദൂരമായി മാറിയതിന്റെ നടുക്കത്തിലാണ് കടമ്പഴിപ്പുറം ഗ്രാമം. കർണാടകയിലെ ചിക്കമംഗളൂരു ബാബ ബുധൻഗിരി മലനിരകളിൽ വിനോദസഞ്ചാരത്തിനിടെ കാണാതായ 15 വയസ്സുകാരി ശ്രീനന്ദയുടെ മൃതദേഹം 1500 അടി താഴ്ചയുള്ള മലയിടുക്കിൽ നിന്നാണ് കണ്ടെത്തിയത്. പത്താം ക്ലാസ് പരീക്ഷ കഴിഞ്ഞ് ഫലം കാത്തിരിക്കവെയായിരുന്നു കുടുംബത്തോടൊപ്പമുള്ള ഈ യാത്ര. ചൊവ്വാഴ്ച വൈകിട്ട് മാണിക്കധാര വെള്ളച്ചാട്ടത്തിന് സമീപം വെച്ച് വെറും നാല് മിനിറ്റിനുള്ളിലാണ് ശ്രീനന്ദയെ സംഘത്തിൽ നിന്നും കാണാതായത്.
ദിവസങ്ങൾ നീണ്ട വൻ തിരച്ചിലിനൊടുവിൽ വെള്ളിയാഴ്ച ഉച്ചയോടെ ഹർഷൻ ഗുപ്ലെയിലെ മലയിടുക്കിൽ മൃതദേഹം കണ്ടെത്തുകയായിരുന്നു. തലയുടെ വലതുഭാഗത്തേറ്റ ഗുരുതരമായ പരിക്കാണ് മരണകാരണമെന്നാണ് പ്രാഥമിക പോസ്റ്റ്മോർട്ടം റിപ്പോർട്ട് സൂചിപ്പിക്കുന്നത്. വീഴ്ചയുടെ ആഘാതത്തിൽ ശരീരത്തിലുടനീളം പരിക്കുകളും അസ്ഥികൾക്ക് ഒടിവുകളുമുണ്ടായിരുന്നു. മൃതദേഹം നാട്ടിലെത്തിച്ചപ്പോൾ ഉറ്റവരും നാട്ടുകാരും തടിച്ചുകൂടിയത് കണ്ടുനിന്നവരുടെ കണ്ണ് നിറച്ചു. പൊതുദർശനത്തിന് ശേഷം കടമ്പഴിപ്പുറത്തെ വീട്ടുവളപ്പിൽ സംസ്കാര ചടങ്ങുകൾ നടന്നു. തങ്ങളുടെ പ്രിയപ്പെട്ട മകൾക്ക് വിങ്ങിപ്പൊട്ടുന്ന ഹൃദയത്തോടെയാണ് നാട് വിട നൽകിയത്.
About The Author
