LDF Predicts Massive Win
തിരുവനന്തപുരം: കേരള നിയമസഭാ തെരഞ്ഞെടുപ്പിന് പിന്നാലെ രാഷ്ട്രീയ സാഹചര്യം വിലയിരുത്തുന്നതിനായി സിപിഎം സംസ്ഥാന സെക്രട്ടേറിയറ്റ് യോഗം മറ്റന്നാൾ ചേരും. സംസ്ഥാനത്ത് എൽഡിഎഫ് ഭരണത്തുടർച്ച നേടുമെന്ന ഉറച്ച വിശ്വാസത്തിലാണ് പാർട്ടി നേതൃത്വം. പ്രാഥമിക കണക്കുകൾ പ്രകാരം 80-ലധികം സീറ്റുകൾ ലഭിക്കുമെന്നാണ് സിപിഎമ്മിന്റെ വിലയിരുത്തൽ. അനുകൂല തരംഗമുണ്ടായാൽ സീറ്റ് നില 100-ലേക്ക് ഉയരുമെന്നും പാർട്ടി കേന്ദ്രങ്ങൾ കണക്കുകൂട്ടുന്നു. മണ്ഡലം, ജില്ലാ കമ്മിറ്റികൾ നൽകുന്ന കൃത്യമായ വിവരങ്ങൾ യോഗത്തിൽ വിശദമായി പരിശോധിക്കും.
സംസ്ഥാനത്ത് ഇത്തവണ രേഖപ്പെടുത്തിയ ഉയർന്ന പോളിംഗ് ശതമാനം ഭരണവിരുദ്ധ വികാരമല്ലെന്നും, മറിച്ച് സർക്കാരിന്റെ വികസന പ്രവർത്തനങ്ങൾക്കുള്ള അംഗീകാരമാണെന്നും നേതാക്കൾ വിലയിരുത്തുന്നു. വടക്കൻ കേരളത്തിലെ പല ജില്ലകളിലും പോളിംഗ് ശതമാനം സംസ്ഥാന ശരാശരിയേക്കാൾ ഉയർന്നത് തങ്ങൾക്ക് അനുകൂലമാകുമെന്നാണ് എൽഡിഎഫ് കണക്കുകൂട്ടുന്നത്. അതേസമയം, തെക്കൻ കേരളത്തിൽ വലിയ മുന്നേറ്റം നടത്താൻ കഴിയുമെന്ന പ്രതീക്ഷയിലാണ് യുഡിഎഫ് ക്യാമ്പ്. ബിജെപി നേതൃത്വം നൽകുന്ന എൻഡിഎ കുറഞ്ഞത് മൂന്ന് സീറ്റുകളിലെങ്കിലും വിജയം പ്രതീക്ഷിക്കുന്നുണ്ട്. മലബാറിലെ കടുത്ത മത്സരവും പോളിംഗ് നിലയും ആരെ തുണയ്ക്കുമെന്ന ആകാംക്ഷയിലാണ് മുന്നണികൾ. മെയ് 4-നാണ് വോട്ടെണ്ണൽ നടക്കുക.
About The Author
