Thrissur Kit Scam Shocks
തൃശൂർ: നിയമസഭാ തിരഞ്ഞെടുപ്പിന് മുന്നോടിയായി വോട്ടർമാരെ സ്വാധീനിക്കാൻ ഭക്ഷ്യക്കിറ്റുകൾ വിതരണം ചെയ്യാനുള്ള നീക്കം തൃശൂരിൽ വീണ്ടും വിവാദമാകുന്നു. തൃശൂർ കാച്ചേരിയിലുള്ള ഒരു അച്ചാർ നിർമ്മാണ യൂണിറ്റിൽ നിന്ന് ഏകദേശം 750 ഭക്ഷ്യക്കിറ്റുകളാണ് തിരഞ്ഞെടുപ്പ് ഫ്ലയിങ് സ്ക്വാഡും പോലീസും ചേർന്ന് നടത്തിയ മിന്നൽ പരിശോധനയിൽ പിടിച്ചെടുത്തത്. ഒരു പ്രമുഖ ബിജെപി നേതാവിന്റെ സഹോദരന്റെ ഉടമസ്ഥതയിലുള്ളതാണ് ഈ സ്ഥാപനമെന്നാണ് പ്രാഥമിക വിവരങ്ങൾ. രഹസ്യ വിവരത്തിന്റെ അടിസ്ഥാനത്തിൽ നടത്തിയ പരിശോധനയിലാണ് വൻതോതിൽ കിറ്റുകൾ തയ്യാറാക്കി വെച്ച നിലയിൽ കണ്ടെത്തിയത്. സംഭവത്തിന് പിന്നിൽ വലിയ തോതിലുള്ള തിരഞ്ഞെടുപ്പ് അട്ടിമറി ശ്രമമുണ്ടെന്ന് സിപിഎമ്മും എൽഡിഎഫ് നേതൃത്വവും ആരോപിച്ചു. തിരഞ്ഞെടുപ്പ് പെരുമാറ്റച്ചട്ടം നിലനിൽക്കെ, സ്വകാര്യ വ്യക്തിയുടെ ഉടമസ്ഥതയിലുള്ള സ്ഥാപനത്തിൽ ഇത്രയധികം കിറ്റുകൾ സൂക്ഷിച്ചത് വോട്ടർമാരെ വശത്താക്കാനാണെന്ന് എൽഡിഎഫ് കുറ്റപ്പെടുത്തി.സംഭവത്തെത്തുടർന്ന് സ്ഥലത്ത് തടിച്ചുകൂടിയ രാഷ്ട്രീയ പ്രവർത്തകർ പ്രതിഷേധം രേഖപ്പെടുത്തി. പോലീസ് കിറ്റുകൾ കസ്റ്റഡിയിലെടുത്തിട്ടുണ്ട്. കിറ്റുകൾ വിതരണം ചെയ്യാൻ ഉദ്ദേശിച്ചതാണോ എന്നും ഇതിന്റെ സാമ്പത്തിക സ്രോതസ്സ് എന്താണെന്നും വ്യക്തമാക്കുന്ന രേഖകൾ ഹാജരാക്കാൻ സ്ഥാപന ഉടമകളോട് പോലീസ് നിർദ്ദേശിച്ചു. സംഭവത്തിൽ സമഗ്രമായ അന്വേഷണം നടത്തി കുറ്റക്കാർക്കെതിരെ നടപടിയെടുക്കണമെന്ന ആവശ്യവുമായി സിപിഎം രംഗത്തെത്തിയിട്ടുണ്ട്.
About The Author
