Illicit Liquor Tragedy in Bihar Kills 5
സമ്പൂർണ്ണ മദ്യനിരോധനം നിലവിലുള്ള ബീഹാറിൽ വീണ്ടും വിഷമദ്യ ദുരന്തം. ഈസ്റ്റ് ചമ്പാരൻ ജില്ലയിലെ മോത്തിഹാരിയിലാണ് അഞ്ചുപേർ വിഷമദ്യം കഴിച്ച് മരണപ്പെട്ടത്. തുർകൗലിയ, രഘുനാഥ്പൂർ പോലീസ് സ്റ്റേഷൻ പരിധികളിൽ ബുധനാഴ്ച മുതലാണ് മരണങ്ങൾ റിപ്പോർട്ട് ചെയ്തു തുടങ്ങിയത്. 25 വയസ്സുകാരനായ യുവാവാണ് ആദ്യം മരിച്ചത്; എന്നാൽ പോലീസ് നടപടി ഭയന്ന് ഗ്രാമവാസികൾ വിവരം പുറത്തുവിടാതെ മൃതദേഹം സംസ്കരിക്കുകയായിരുന്നു. നിലവിൽ ഒമ്പത് പേർ വിവിധ ആശുപത്രികളിൽ ചികിത്സയിലാണ്, ഇതിൽ മൂന്ന് പേരുടെ നില അതീവ ഗുരുതരമായി തുടരുന്നു. വിഷമദ്യം കഴിച്ച ആറ് പേർക്ക് കാഴ്ചശക്തി നഷ്ടപ്പെട്ടതായാണ് പുറത്തുവരുന്ന പ്രാഥമിക വിവരങ്ങൾ.
സംഭവവുമായി ബന്ധപ്പെട്ട് ഒരു വില്ലേജ് ചൗക്കിദാർ ഉൾപ്പെടെ 12 പേരെ പോലീസ് അറസ്റ്റ് ചെയ്തിട്ടുണ്ട്. ഡ്യൂട്ടിയിൽ വീഴ്ച വരുത്തിയ തുർകൗലിയ പോലീസ് സ്റ്റേഷൻ എസ്എച്ച്ഒയെ (SHO) സസ്പെൻഡ് ചെയ്തു. സംഭവത്തെക്കുറിച്ച് അന്വേഷിക്കാൻ പ്രത്യേക അന്വേഷണ സംഘത്തെ (SIT) നിയോഗിച്ചതായി എസ്പി സ്വർണ്ണ പ്രഭാത് അറിയിച്ചു. മദ്യനിരോധനം നിലനിൽക്കുന്ന സംസ്ഥാനത്ത് വ്യാജമദ്യം ഒഴുകുന്നത് ഭരണകൂടത്തിന്റെ പരാജയമാണെന്ന് ചൂണ്ടിക്കാട്ടി പ്രതിപക്ഷം രംഗത്തെത്തിയിട്ടുണ്ട്. കഴിഞ്ഞ ഒരു പതിറ്റാണ്ടിനിടെ ബീഹാറിൽ വ്യാജമദ്യം കഴിച്ച് ആയിരത്തിലധികം ആളുകൾ മരണപ്പെട്ടതായാണ് ഔദ്യോഗിക കണക്കുകൾ സൂചിപ്പിക്കുന്നത്.
https://www.instagram.com/media7onlive/p/DWsV6vDkxNr/
About The Author
